خزعبلات سياسيّة تونسيّة .. “يا مزيّن مالبرّا آش أحوالك من الدّاخل”

بقلم : منير فلاح

سي سليم العزّابي هو هالأيّامات نجم المحطّات الإذاعيّة والتّلفزيّة، خاصّة بعد ما عمل النّدوة الصّحفيّة للإعلان الرّسمي على تأسيس”تحيا تونس”… سي سليم العزّابي هو في الحقيقة”سياسي”من الجيل الجديد وراني ما نقصدش العمر برك، نقصد خاصّة حاجة من نوع برمجيّة جديدة ومحرّك بحث جديد والصّفات هذي الكلّ تنجّم تواتي سي سليم العزّابي على خاطرو تقول مصنوع صنعان لها المُهمّة: إقناع النّاس أنّو حزب سياسي ينجّم يتأسّس برك على شكل دون مُحتوى.

واللّه،وماعندكم علاش تحلّفوني،قعدت نتبّع ونثبّت فمّاش ما نلقى حويجة تخلّي الواحد يقول هذا “نداء”وهذا”تحيا”!وحتّى وقت اللّي بعض صحافييّن شدّوا في سي سليم وقبلو في الإطارات العليا(سامحوني، ما إستعملتش كلمة كوادر خاطرها فيها دوزة سياسيّة قويّة على جماعة نداء 2.0)، شدّوا فيهم وحبّو يسمعوا منهم فاش يختلفوا علّي سبقوهم فكان دائما الجواب نفسو:أحنا وسطيّين وباش نعملو طريقة جديدة متاع تأسيس و … الحقيقة، أنا مشى في بالي اللّي الحكاية تتعلّق بطريقة تسويق جديدة للشّركة عفوا الحركة متاعهم! وقلت هاذم قاعدين يعملوا في suspence باش نهار اللّي يخرج فيه number one متاعهم تكون خرجة مليانة، مش برك باللّوك متاع سي سليم العزّابي لكن زادة بالمحتويات!

وبما أنّي نبّار يحترم نفسو وخدمتو، إستنّيت النّدوة الصّحفيّة متاع”تحيا تونس”وبعدها وأكيد راكم الكلّ عشتو كيفي raz-de-marée على وسائل الإعلام وحتّى مواقع التّواصل الإجتماعي بالمنشورات sponsorisé وقبل ما يوفى الأسبوع السّياسي(سهرة نهار الجمعة)،خرجلنا سي سليم العزّابي على الوطنيّة الأولى خرجة بالطّاولة والكراسي(وما نقصدش برك الموبيلية) فيها التّقديم :سي سليم مُحاط بعلامات التّشكيلات السّياسيّة اللّي تعدّى منها والحقيقة فكّرتني في التّصريحات اللّي يعملوها الممرّنين والملاعبيّة قبل وإلّا بعد الماتش ووراهم لوحة ملصّقّ عليها علامات les sponsors ! وإسمحولي هنا باش نتوقّف على هالصّورة هذي اللّي فكّرتني في روبرتاجات الكورة، ماكم تعرفوني صحيح أنتريتي، لكن “كوّارجي”… الصّورة هذيكة عطاتنا فكرة على مختلف الفِرق اللّي كوّر فيها سابقًا وهو كيف برشة من جيلو تنقّل ياسر من فريق لآخر :من 2011 لليوم لعب في أربعة فِرق، عفوا، نشط في أربعة أحزاب لكن باش واحد ما يظلمش المنسّق الشاب،بوصلتو واضحة وديما متمركز في الأحزاب الطّالعة! وهو زادة رياضي ما ينساش الفرق اللّي تكوّن فيها وعجبني كيف عمل ملاحظة واضحة وجليّة لفريق برنامج متاع الوطنيّة وقاللهم:‘نسيتو باش تذكروا نداء تونس ، راني لعبت فيه قرابة الستّة سنين’! “دخلتو”هذي وتصحيحو للمعطيات شيء محترم في حدّ ذاتو، لكن لبّ الموضوع سياسي(في بالي هكّة) وقعدت نستنّى وقتاش باش تدخل السّياسة والمنشّط والمعلّق الحقيقة كانوا حطّ فمّ تلقى فمّ، معنتها بصريح العبارة، حضّارة وبرّة وعدّهم باش يقوموا يباركو لدار العرس! معناتها، كيف سألوه على التّأسيس والشّباب والبرامج والعلاقات مع الأحزاب الأخرى، جاوبهم الأجوبة اللّي ما هيش أجوبة(يعني بعد ما تسمعها ما تعرفش حتّى شيء بوضوح على ها الكائن السّياسي الجديد) وهمّ عجبهم الحال وقالوا فيه البركة ونتعدّاو لحاجة أخرى وهذا ما ينجّم يدلّ حسب رأيي كان على حاجة برك:سي سليم العزّابي كان يتحرّك في milieu conquis بالمسبّق…

ووقت جات الفقرة الخاصّة بسبر الآراء، قلت بيني وبين روحي:هاهي جات فرصة باش المنشّط والمحلّل يلقاوا مادّة “علميّة” يبنيوا عليها أسئلة تنجّم تُحرج الضّيف المُبجّل وتخرّج “القْرينتا اللّي فيه” لكن وبالنّسبة للأسئلة غالبيّتهم محطوطين في سياق ما تستنّى منّو كان تعاطي إيجابي مع “الحزب الجديد”وبالنّسبة لإستغلال الصّحفيّين للسّبر كان شبه غايب وسي سليم العزّابي عبّر على فرحتو très  mesurée وقت السّبر قال أنّ النّاس سمعت بحزبو(وإلّا هم يقولوا زادة حركة؟) وتعرف إسمو! يا واللّه أحوال، يعني وبعد الهلّيلة اللّي عاملينها في كلّ بلاد وبرّ وعدّك باش تحلّ الفريقو يخرجلك منّو حزب تحيا ويحبّ يقنعنا اللّي هو متفاجئ بتتبّع النّاس لأخبارهم(تي ما هو من نكد الدّهر، ولّينا نتفرّجوا في حزب كلّ عام يخرجوا منّو جماعة ويلبسوا كساوي ويعملولنا شو متاع أنا جديد وخاطيني وصوّتولي والمرّة الجاية ما نتحالفش مع النّهضة…) وحتّى كيف سمع اللّي غالبيّة النّاس المتعاطفين معاهم هم من جيل فوق الأربعينات وجايين من جمهور النّداء، علت الإبتسامة محيّاه ووعد الشّباب في الجيهات أنّو باش تكون عندهم هياكل وبرامج خاصّة بيهم و…و…لكن لم يحدّد توجّه حزبو شنوّة؟شدّ في العايلة الوسطيّة وما خرجش منها والكلام هذا ما هم قالوه الكفاءات متاعو قبل النّدوة الصّحفيّة؟

وبعد ما كمّلت تفرّجت، تفكّرت هاك المواضيع اللّي كانوا بعض المعلّمين وأساتذة اللّغة العربيّة يطرحوهم علينا بعد العطلة ولّي يطلبوا فيهم من التّلاميذ والتّلميذات باش يعرضوا ذكرياتهم وما علق بأذهانهم. وطرحت الموضوع على نفسي النبّارة ولقيت أشياء مشتّتة من نوع:أحنا ما ناش ضدّ حدّ(ويني السّياسة سيدي خويا؟) ونتمنّاوا وباش نعملوا على أن يكون الإنخراط عدد واحد بإسم رئيس الحكومة(بالظبط كيف ما كان وقت بن علي:يوسف الشّاهد هو التّحياوي الأوّل) الإشراف على المؤتمر التّأسيسي عمليّة فنيّة جبنالها شخصيّة مستقلّة وما هيش لا منتمية ولا باش تنتمي للحزب الجديد(ومن أبجديّات العمل الحزبي أنّ المؤتمرات هي في أعلى سُلّم القرار الحزبي وما تنجّمش تكون تقنيّة) إلخ…

وفي نهاية الإنشاء اللّي عملتها في رأسي، حطّيت:وفي نهاية التّحليل، الحزب الجديد هو “تحديث”simple mise à jour لنداء الباجي قائد السّبسي بمعلّقة جديدة فيها وليدات شباب وشبّان وبنيّات زادة وكانوا ينجّموا يكونوا أبطال وبطلات مسلسل مابعد 2011،الوجوه جديدة والحكاية هي بيدها