بقلم : لزهر الضاوي
..” دار الضيافة” هاذي..”عتبة مشومة”..
ومُحال.. كان تتشكل منها “حْكومة”..
شهرين..فيها “الجملي” تكسّر وجهو..
وخرج منها ..”مْنسّل الشلغومة”..!!
ومن بعدو..جاها “الياس”..يجرّب حظّو..
في بالو البيعة سالْكة..محسومة..
يطلع عليه “الشيخ”..باسو.. وعَضّو..
خلّاه يزوي في مثيل البومة..!!
………………….
..و” مْيات يوم”..على “الرئيس” تعدّوا..
لا عرفنا آمس خير..ولّا اليومة..؟؟..
والشعب هاو مازال مْلقّي خدّو..
يطلع عليه ” حلّوف..بوزمزومة”..
يجري عليه في” السوق”..لا من شدّو..
قَطّع جيوبو الفالْسة المخرومة..
و”القرض”..بعد” القرض”..آشكون تيْردو..؟؟
وسْط “الدّيون” حْلِت بيه العومة..؟!!
ومِسْتنّي “ريح العِطْر” فاوحْ نَدّو..
يهَبْهبْ عليه ما بين “بصلة”..و”ثومة”..؟؟!!
…………………………
يلعن “زمان القهر” و”بوه”..و”جدّو”..
خَلّى “تونسنا” دايخة..مصدومة –
التعليقات مغلقة.