بقلم : لزهر الضاوي
…شكلناها…شكلناها..
وأخيرًا…………..شكلناها..!!
” حُكومتنا الوطنية”..
ياما..ياما استنّيناها..!
وبْ بَرَكاتك يا” الجملي”..
” انشالله” نقولو ..” نقّزْناها “..!!
وتونس مِ الفرْحة..باش تهبل..
بِرْجالْها..” تزغْرت “..ونساها..!!
وقام الشعب الكلّو مْفَلْفل..
قُدّام العالم..يتْباهى..!!
..شكّلنا ” الغنْجة”….” الشّهلولة”..
دَرْبيناها….ورَوّمْناها..!
و” الجملي” جايب ” بَسْكولة”..
يوزن بيها في ” النّزاهة”..!!
و” الكفاءات..المسؤولة”..
” المستقلة”..عْلى ” مولاها “..؟!
جابت لينا ..” حْليب الغولة “..
باش تبري تونس من داها..!!
………………….
..يا” سْعيّد”..نادي “الغنوشي”..
خَلّي يقرا عْلينا أسْماها..؟؟
و” بجاه ربي” ..ما تسبّوشي..
موش هوّ..راهو سمّاها..؟!
..وخلّونا في ” جوّ الفرْحة “..
وحتى” الأزْمة “…انسوا بْلاها..؟؟
..ويا تونس الْبِسْ ” الطّرْحة “….
..مَحْلا العيشة في الَبَلاهة..!!
..تشكيل الحكومة أوْلى..
والحكومة شكلناها..!!
وما تحكيليش عْلى ” الدوْلة”..
هاذيكا ماو..” شَلّكناها “..
..صْبَرْنا.. و “حنّ علينا الموْلى”..
وفلّسْناها ..و ” ترّكْناها “..!!
وغدوة اللعْب فْ آخر جوْلة..
نَقْرو “الفاتْحة”..على مثْواها..!!
..والمُهم شكّلنا ” حْكومة “..
..شكلناها..شكلناها..!!!
التعليقات مغلقة.