خزعبلات سياسيّة تونسيّة : يا سلّاك الواحلين…ربّي عليك معمّلين!!…

بقلم : منير فلاح

الأستاذ عبد الفتّاح مورو هو واحد من أكثر السّياسيّين المثيرين للحيرة والجدل وهذي في الحقيقة في حدّ ذاتها ميزة قليل وجودها وتخلّي مولاها دائم الحضور تقريبا على السّاحة الإعلاميّة. الأستاذ عبد الفتّاح مورو هو واحد من المؤسّسين ّالثّلاثة للجماعة الإسلاميّة في تونس بداية سبعينات القرن الماضي: راشدالخريجي(الغنّوشي) وحميدة النّيفر. وفي الحقيقة، الجماعة الإسلاميّة كانت المرحلة الثّانية في مسيرة الأستاذ عبد الفتّاح مورو بعد إنخراطه في مجموعة صوفيّة مناهضة للإستعمار…

الجماعة الإسلاميّة هذي، وبعد تعرّض الثّلاثة المؤسّسين للإيقاف في سوسة بعد أن حاولوا عقد إجتماع ، و”غطست” في السريّة وكوّنت خلايا في مختلف المناطق…حتّى لعام 1981وين تمّ الإعلان عن تأسيس “حركة الإتّجاه الإسلامي” اللّي يحتلّ فيها الأستاذ مورو الموقع الثّاني بعد راشد الخريجي. بقيّة مسيرتو بدات بالسّجن وإثر جريمة باب سويقة أعتقل مجدّدا وتعرّض لحملات تجريح وتشهير مسّت من ذاته…ودخل في مرحلة”مهادنة” فندّد بالعنف وذهب إلى حدّ إعلان تعليق عضويّته بحركة الإتّجاه الإسلامي(النّهضة حاليّا) وإبتعد عن ممارسة الشّأن السّياسي إلى حدود سنة 2011 تاريخ عودة راشد الغنّوشي إلى تونس . حتّى لهنا، يتبادر للذّهن أن الأستاذ عبد الفتّاح مورو هو قيادي نهضاوي “عادي”، لكن الرّجل أكثر من ذلك! وهو حريص على تنمية بل “الإستثمار” في إختلافو المُفترض! فمن حيث المظهر الخارجي، حافظ على الزيّ البلدي التّونسي وقت الّي برشة من إخوانو تعدّاو للّباس الإفرنجي، كيف ما كانوا يقولوا ناس بكري وباش ما يتصنّفش “قْديم وكذا” تعدّى في talkshow وصرّح بشديد تعلّقو بالموسيقى الكلاسيكيّة والفنّ الأوبرالي وكان ما خانتنيش الذّاكرة، عمل فصيّل غنائي باللّغة الألمانيّة! وفي برنامج تلفزي آخر، صرّح أنّو ما يفلّتش فرصة باش يمشي مع عايلتو لعرض مسرحي وإلّا سينمائي ولّي يتفرّج فيه وقتها يقول بينو وبين روحو : يحيى الإعتدال! وصعيب على برشة ناس باش يحطّوا نفس الإسم والصّورة علّي يصرّح أنّو الرّافضين للفنّ عندهم فهم سطحي للإسلام ونصوصو وعلّي يستقبل وجدي غنيم ويبشّروا ويطمّنو إلّي هم حاجتهم بأولادنا وأحفادنا وبقيّة الهدرة تعرفوها… وفي الحقيقة ، نقطة قوّة الأستاذ عبد الفتّاح مورو هي جعل المتابع في حيرة من أمرو: زعمة مورو بالحقّ خوانجي؟؟

الأستاذ عبد الفتّاح مورو إخواني مائة بالمائة! يتميّز على الأخرين برك في l’emballage حتّى أنّو برشة أطلقو عليه لقب الثّعلب وفي السّياسة مش سبّة لأنّها تعبيرة عن إعتراف بالدّهاء … ويظهرلي أن الأستاذ مورو مارس(وبالكش حتّى مازال) المناورة خارج النّهضة وحتّى داخلها. في 2011 ووقت إنتخابات المجلس الوطني التّأسيسي، يقولوا أن القرضاوي طلب بنفسو من الغنّوشي باش يكلّف مورو بالحملة الإنتخابيّة متاعهم، لكن مورو رفض وتمسّك ب”إستقلاليتو”على النّهضة وعمل تحالف إنتخابي وسطي قدّم قائمات في أكثر من عشرين دائرة…هذا ما منعش الأستاذ عبد الفتّاح مورو باش يطوي حكاية الإستقلاليّة ويرجع للنّهضة في مؤتمرها عام 2012 ويولّي مُمثّل شخصي لرئيسها الغنّوشي وهو بالوضوح إعتراف متبادل بأنّ كلّ واحد من الطّرفين ما ينجّمش يستغنى على الآخر وكلّ ما يمشي في بالنا الكلّ أنّو الأستاذ عبد الفتّاح مورو هو توّة فقط نائب رئيس مجلس نوّاب الشّعب وقايم بدورو حسب ما يقتضيه القانون الدّاخلي متاع المجلس، صحيح بطريقتو الخاصّة وبson grain de sel(آش مجبّدني في الملح توّة؟؟) تجيه فرصة ذهبيّة باش يرجع نجم الأخبار ومحور التّساؤلات:زعمة باش يستقيل من نيابة الرّئاسة وإلّا لا؟ زعمة رجع للمجلس وإلّا ما زال متغشّش؟وتبدى عاد الإذاعات وحدة تأكّد والأخرى تنفي وأخرى تتّصل ب”مصدر المعلومة الرّسمي” وتجي أخيرا (أوف سلّكناها والحمد للّه!) البلاغات الرّسميّة من مجلس النوّاب والصّور المصاحبة بعودة الشّيخ الأستاذ المحامي عبد الفتّاح مورو لمعدنه البرلماني وتنبري همّة حزب النّهضة فتندّد بالحملات ضدّ الأستاذ عبد الفتّاح مورو comme quoi وقت اللّي يجد الجدّ ، كلّ حدّ يدافع على متاعو! والبيان الإعلامي متاع حزب النّهضة هو وحسب رأيي النبّار المتواضع عندو برشة دلالات منها أنّو الأستاذ عبد الفتّاح مورو مازال عندو دور مركزي في الإستراتيجية متاعهم:تضييع الجُرّة! على خاطر هو من القلائل باش ما نقولش الوحيد القادر باش يدخّل الشكّ في أمخاخ برشة ناس ويخلّيهم يظنّوا أنّ النّهضة تنجّم تكون قطعت مع تنظيم الإخوان ومع العنف وتَتونست كيف ما يقولو برشة مختصّين في السّياسة وفي تحليل الخطاب السّياسي وهو زادة اللّي ينجّم ينكر في سنوات سابقة حديثو الموثّق مع الدّاعية وجدي غنيم وبعد،حديثا، يقول أنّو كان غالط…ويلقى ناس تصدّقوا! هو الوحيد، بين النّهضاويّين القياديّين، اللّي ينجّم “يبيّض” صورة حزبو في مرحلة أصبح فيها الحديث على التّنظيم السرّي يؤرق القيادات الأخرى… هو الوحيد في قيادات الصفّ الأوّل اللّي ينجّم يقول أنّو موقعو في هياكل النّهضة صوري وتشريفي وياخذ ساعات مسافة من الحزب وتاريخو ومع ذلك يبقى في الحزب وأبرز وجوهه البرلمانيّة…

الأستاذ عبد الفتّاح مورو هو ببساطة أحسن pièce في l’artillerie متاع النّهضة خاصّة الآن خاطرهم توّة في حاجة لفترينة تونسيّة بالجبّة والكبّوس وعلى خاطرو ينجّم يكون alternative في أيّ لحظة لأنّو تونسي شكلا وحديثا وعبارات و “فازات” لكنّ اللبّ إخواني لا ريب! وبالمناسبة، النّهضة و الأستاذ عبد الفتّاح مورو ينجّموا يشكروا التيّاريّة الأستاذة سامية عبّو إللّي أتاحتلو هو وحزبو فرصة ذهبيّة باش ينتقلوا من موقع القرار في تسيير حملات التّكفير والتّشهير إلى موقع ضحيّة الإتّهام بعدم الحياد…