الْمْراَيْفة ..
بقلم : اسيا التوايتي
كلمة مايعرفوهاش الناس الكل واذا صار وعرفوها قلِّة ..يغيب عليهم معنى عميق..ْ
مْرايفة …علىَ ريحة الحْبايِبْ… على بَلغَة وجِبّة وصباطو الابيض وشعرو الشايبْ …
مْرَايفَة …
والعيب ْ الّي فيهم شاَيْفة …
والفرحة القصيرة برشة …الي فيسع توفى وفيسع من فمي خَطْفوُها … خاَيفَة …
مرَايفَة وخايفَة …لا لحُب إلى في قلبي يِكبر … ويزيد يكبرْ…
وتتعدى سْحَابَة وتْمَطِّرْ والشمس الّي كنت نرَى فيها تِغبْر …
والضّحْكَة المعْجُونَة كي خُبزَة …مخبُوزَة برشة باش تَطرَى … مَنفُوضَة من فُوقْهاَ الغَبْرَة …
مكتوُبَة كيفْ نَصّ وعِبرَة …
مرايفة …ايْ على باباَ مرَايْفة …على هوايا مرايفة …خاَيْفَة يهزوُّلي النّفَسْ …
ويزرعُولِي في ثنيِتِي جْرَس كل مانِتعَدَّى ينوُقزْلي يقلي :ازرب روُحِك …افرح شوَية بركَة واخرُج … ويبدى يوريلِي في ثنيتِي وانا مانحفظش ثنية الرجُوع …
مهما نجوُع … حتى لو نمشِي في صَحراء …
نكره نرجَع …
نكره “نفصع”… نكره نضحك شوية بركَة … على خاطرني نرايَف … وكي نحب يهزوني قطَايف … يصنعُو مني برشة فرحَة للناسْ الكُل … الي ليّا … كيف نرايف … ننسَى الي انا إِنسِية … نولي ضبَابة …نولي نسْمة …نولي نضْوي على البراني … وهو مايضويش عليّا …
على خاطر موش بركة نراَيف… انا نوَالِف ْ …
والوِلفِي … طفُل صغِير …فيسع يبكِي … فيسع يشكِي …فيسع يضحَك … وديما مراَيف ….
التعليقات مغلقة.